ఈ శుక్రవారం మరో నాలుగు సినిమాలు విడుదలవుతున్నాయి. మార్చి 19 న విడుదలవుతున్న ఈ నాల్గూ ప్రముఖ హీరోలవే.
ముఖ్యంగా మెగా ఫ్యామిలీ నుంచి ఇంకో వారసుడు పవన్ తేజ్ కొణిదెల ప్రేక్షకుల్లోకి వచ్చేస్తున్నాడు. మెగాస్టార్ చిరంజీవి నటించిన ‘ఖైదీ నెం.150’ లో చిన్న పాత్ర వేసిన ఇతను ఇక పూర్తి స్థాయి హీరోగా వచ్చేస్తున్నాడు. ‘ఈ కథలో పాత్రలు కల్పితం’ దీని టైటిల్. ఎంవిటి ఎంటర్టయిన్మెంట్స్ పతాకంపై రాజేష్ నాయుడు నిర్మించిన దీనికి అభిరామ్ ఓం దర్శకత్వం వహించాడు. పవన్ తేజ్ సరసన మేఘనా కుమార్ హీరోయిన్ గా నటించింది. సంగీతం కోసం కార్తీక్ కొడకండ్ల, ఛాయాగ్రహణం, సునీల్ కుమార్ ఎన్, ఎడిటింగ్ తిరు బి సమకూర్చారు.
‘ఆర్ ఎక్స్ 100’ ఫేమ్ హీరో కార్తికేయతో ‘చావు కబురు చల్లగా’ రోమాంటిక్ కామెడీ ఎంటర్టయినర్ గా వుంటుంది. ఇందులో లావణ్యా త్రిపాఠీ హీరోయిన్. దీనికి పి. కౌశిక్ కొత్త దర్శకుడు. జిఎ 2 పిక్చర్స్ నిర్మాణం. ఇందులో ఇంకా ఆమని, మురళీ శర్మ, శ్రీకాంత్అయ్యంగార్, రజిత, అచంట మహేష్, భద్రమ్, ప్రభు ఇతర పాత్రల్లో నటించారు. ఒక శవాల్ని తీసికెళ్ళే మార్చ్యురీ వ్యాన్ డ్రైవర్ కీ, నర్సుకీ మధ్య కామెడీగా సాగే ప్రేమ కథ ఇది.
ఇక మోహన్ బాబు ఫ్యామిలీ నుంచి మంచు విష్ణు చాలా కాలం తర్వాత దర్శన మిస్తున్నాడు. ‘మోసగాళ్ళు’ అని టైటిల్. కాజల్ అగర్వాల్ హీరోయిన్ గా కాదుగానీ విష్ణుకి సోదరిగా కనిపించబోతోంది. ఏవీఏ ఎంటర్టయిన్మెంట్, 24 ఫ్రేమ్స్ ఫ్యాక్టరీ సంయుక్త నిర్మాణం. జెఫ్రీ జీ చిన్ దర్శకుడు. 2016 లో మీరా రోడ్ కాల్ సెంటర్ సంఘటనని తెరకెక్కించారు.
ఇక చాలా కాలం తర్వాత వస్తున్న ఇంకో వారసుడు, సాయికుమార్ కుమారుడు ఆది నటించిన ‘శశి’ రోమాన్సు, డ్రామాలతో కూడి వుంటుంది. సురభి హీరోయిన్. శ్రీ హనుమాన్ మూవీ మేకర్స్ బ్యానర్‌లో ఆర్‌పి వర్మ, చావళి రామంజనేయులు, చింతలపూడి శ్రీనివాస రావు సంయుక్తంగా ఈ చిత్రాన్ని నిర్మించారు. శ్రీనివాస నాయుడు నడికట్ల దర్శకుడు. రాశీ సింగ్, జయప్రకాష్, రాజీవ్ కనకాల, అజయ్, వైవా హర్ష ఇతర తారాగణం. సంగీతం అరుణ్ చిలువేరు, ఛాయాగ్రహణం అమర్‌నాథ్ బొమ్మిరెడ్డి, ఎడిటింగ్ సత్య జి. ఈ నాల్గు సినిమాలకి ప్రేక్షకుల తీర్పు ఎలా వుంటుందో శుక్రవారం వరకు వేచి చూడాల్సిందే.