జనవరి 26న రిపబ్లిక్ డేకి ఏర్పాట్లు జోరుగాసాగుతున్నాయి. కరోనా ఆంక్షలు పోయి, దేశం మళ్లీ పూర్వపు పరిస్థితికి వస్తున్న సమయంలో ఈ రిపబ్లిక్ డే సంబరం జరుగుతూ ఉంది. అందుకే కరోనా పాండెమిక్ ఛాయలు ఈ రిపబ్లిక్ డే సంబరంలో కనబడుతూనే ఉంటాయి. అయితే, ఈ ఏడాది రిపబ్లిక్ డే కి కొన్ని ప్రత్యేకతలూ ఉన్నాయి. ఇలాగే కొన్నింటిని కరోనా కారణంగా రద్దు చేశారు.
ఈ ఏడాది విశేషాలు:
*భారత్ ఫ్రాన్స్ నుంచి కొన్న రాఫేల్ యుద్ద విమానాలు ఈ ఏడాది రిపబ్లిక్ డే విన్యాసాల ప్రత్యేకత. ఈ విమానాలు భారత్ కు గత సెప్టెంబర్ లో అందాయి. మొత్తం 30 విమానాలను భారత్ కొంటున్నది. ఇందులో 11 దేశానికి అందాయి.
*భారతదేశపు మొట్టమొదటి మహిళా ఫైటర్ పైలట్ భావనా కాంత్ ఈ సారి రిపబ్లిక్ డే పరేడ్ లోని మరొక ప్రత్యేకత. ఇండియన్ ఎయిర్ ఫోర్స్ శకటం మీద ఆమె కనిపిస్తారు.
*ఈ సారి 122 మంది సిపాయిలు ఉన్న బంగ్లాదేశ్ సాయుధ దళం కూడా పరేడ్ లో పాల్గొంటుంది. విదేశీ సాయుధ దళాలు కూడా అపుడపుడూ రిపబ్లిక్ పరేడ్ లో పాల్గొంటూ ఉంటాయి. 2016లో ఫ్రాన్స్ దళం, 2017 లో యుఎఇ దళం పాల్గొన్నాయి.
*ఈ సారి అయోధ్య రాయాలయాన్ని ఉత్తర ప్రదేశ్ ప్రభుత్వము తమ శకటంగా ప్రదర్శిస్తూ ఉంది.
అయితే, ఈ రిపబ్లిక్ పరేడ్ లో కొన్ని విషయాలు మిస్సవుతున్నాయ్. అవేంటంటే…
*ఈ సారి భారత్ రిపబ్లిక్ డే లో చీఫ్ గెస్ట్ ఎవరూ ఉండటంలేదు. భారత ప్రభుత్వం ప్రతి యేడాది రిపబ్లిక్ డే కి ఒక విదేశీ అధ్యక్షుడిని ప్రధాన అతిధిగా ఆహ్వానిస్తారు. ఈసారి కరోనా కారణంగా చీఫ్ గెస్టు ఉండటం లేదు. నిజానికి ఈ సారి భారత్ బ్రిటిష్ ప్రధాని బొరిస్ జాన్సన్ ను ప్రధాన అతిధిగా ఆహ్వానించింది. ఆయన కూడా అంగీకరించారు. ఇపుడు ఇంగ్లండులో కోవిడ్ తిరగదోడిన కారణంగా ఆయన రావడం లేదు. గతంలో 1952,1953, 1966లలో మాత్రమే చీఫ్ గెస్టు ఎవరూ లేరు.
*కరోనా కారణంగా రిపబ్లిక్ పరేడ్ కు ప్రేక్షకుల మీద ఆంక్షలు విధించారు. ఈ సారి కేవలం 25 వేల మందిని మాత్రమే ఆహ్వానిస్తున్నారు. గత ఏడాది 1,50,000 మంది హాజరయ్యారు. విలేకరుల సంఖ్యను కూడా 300 నుంచి 200కు తగ్గించారు.
*వెటరన్స్ పరేడ్ తో పాటు, సైనికుల మోటార్ సైకిల్ విన్యాసాలను రద్దు చేశారు.
ఇండియాగేట్ దగ్గిర విన్యాసాలను వీక్షించేందుకు 15 సంవత్సరాలలోపు పిల్లలను ఆహ్వానించడం లేదు.