Home Breaking తెలుగు ఎలెక్ట్రానిక్ మీడియాకు సూపర్ ఆఫర్

తెలుగు ఎలెక్ట్రానిక్ మీడియాకు సూపర్ ఆఫర్

276
0

బెర్ముడా ట్రయాంగిల్ రహస్యాన్ని పరిశోధించనున్న తెలుగు మీడియా ఛానల్స్… అంతర్జాతీయ పత్రికల్లో పతాక శీర్షిక.

భారత మీడియా కీర్తి కిరీటంలో మరో కలికితురాయి చేరింది. ఇప్పటిదాకా మానవ మేధస్సుకు అంతుచిక్కని బెర్ముడా ట్రయాంగిల్ రహస్యాన్ని చేధించడానికి తెలుగు మీడియా సన్నదమౌతున్నట్టు తెలుస్తోంది. ఎంతోమంది సైంటిస్టులు, ఎన్నో దేశాలకు చెందిన పరిశోధకులు విప్పలేని చిక్కుముడిని విప్పే బాధ్యత తెలుగు మీడియాకు దక్కనుందని సమాచారం. నిన్న స్విట్జర్ల్యాండులో జరిగిన ఐక్యరాజ్యసమితి అత్యవసర సమావేశంలో అమెరికా, బ్రిటన్ లాంటి అగ్రరాజ్యాలు, రష్యా జపాన్ లాంటి మిత్రదేశాలు, పాకిస్తాన్ చైనా లాంటి శత్రుదేశాలు ఇలా అందరూ ముక్త కంఠంతో ఈ బృహత్ కార్యాన్ని తెలుగు మీడియాకు అప్పగించాలని ఘోషించారని విశ్వసనీయవర్గాల అభిప్రాయం. ఈ విషయంపై మరిన్ని వివరాలు తెలుసుకోవాలని ప్రయత్నించిన ఫేకుడు ఐక్యరాజ్యసమితి ప్రత్యేక ప్రతినిధికి చాలా ఆశ్చర్యకరమైన సంగతులు తెలిశాయి.

సినీనటి శ్రీదేవి అకాలమరణం తర్వాత తెలుగు మీడియా చేసిన పరిశోధనలు అంతర్జాతీయ స్థాయిలో ఒక గుర్తింపు తెచ్హిపెట్టిందని, ముఖ్యంగా బాత్ టబ్లోకి దూరి మరీ విశ్లేషన చేసిన మహాటీవీ జర్నలిస్టుకు ప్రతిష్ఠాత్మక పులిట్జర్ అవార్డ్ ఇవ్వనున్నారని తెలిసింది. అలాగే కేసుకు ఏమాత్రం సంబంధం లేని వ్యక్తులను స్టూడియోకి పిలిచి వాళ్ళ అభిప్రాయాలను కేసులోకి చొప్పించాలని చేసిన ప్రయత్నం కూడా జర్నలిజాన్ని కొత్త పుంతలు తొక్కించిందని ఐక్యరాజ్యసమితిలో ఒక బలమైన నమ్మకం ఏర్పడినట్టు వినికిడి. ఇవన్నీ గమనించిన ఐక్యరాజ్యసమితి సభ్యదేశాలు తెలుగు మీడియా మాత్రమే బెర్ముడా ట్రయాంగిల్ సమస్యను పరిష్కరించగలుగుతుందని ఏకాభిప్రాయానికి వచ్చినట్టు తెలిసింది. విషయం తెలిసిన మీడియా ప్రతినిధులు జరిగిన పరిణామాల పట్ల హర్షం వ్యక్తం చేస్తున్నారు. బెర్ముడా ట్రయాంగిల్ సమస్యను పరిశోధించి టీవీ9 అన్వేషణ కార్యక్రమంలో టెలికాస్ట్ చెయ్యాలని ఇప్పటికే ప్రణాళికలు రచించినట్టు తెలుస్తోంది. మరోవైపు బెర్ముడా ట్రయాంగిల్ మీద ఆర్కే మర్క్ సునిశిత విశ్లేషణ ఉండాలని ఆయన అభిమానులు కోరుకుంటున్నారు.

ఇదిలా ఉంటే విమర్శకులు మాత్రం తెలుగు మీడియాకు బెర్ముడా ట్రయాంగిల్ సమస్యకు ఫ్యామిలీ ప్లానింగ్ ట్రయాంగిల్ కు మధ్య తేడా ఆట్టే తెలియదని, కాబట్టి ఈ పరిశోధన ఫలితం ఎలాగైనా ఉండచ్చని ఆందోళన వ్యక్తం చేస్తున్నారు.

(సోషల్ మీడియాలో చక్కర్లు కొడుతున్న ఒక మంచి పోస్టు)

LEAVE A REPLY

Please enter your comment!
Please enter your name here